No.1
Rasulullah ﷺ ne farmaaya: Qur'aan padho, kyun ke yeh Qayaamat ke din apne padhne waalon ke liye sifaarishi ban kar aayega. (Muslim: 1874)
No.2
Hazrat Usman Bin Affan Raziyallahu Anhu farmaate hain ke maine Rasulullah ﷺ ko yeh irshaad farmaate hue suna: Jo shakhs Isha ki namaaz jamaat ke saath padhe, goya usne aadhi raat ibaadat ki aur jo Fajr ki namaaz bhi jamaat ke saath padh le, goya usne puri raat ibaadat ki. (Muslim: 1491)
No.3
Hazrat Abu Hurairah Raziyallahu Anhu se riwaayat hai ke Rasulullah ﷺ ne irshaad farmaaya: Allah Ta'ala ko sab jagahon se zyaada mehboob masajid hain aur sabse zyaada naapasand jagahein baazaar hain. (Muslim: 1528)
No.4
Rasulullaah ﷺ ne farmaaya: Jis ne qible ki taraf thooka to woh Qayaamat ke din is haal me aayega keh woh thook us ki donon aankhon ke darmiyaan hoga. (Abu Dawood: 3824)
No.5
Rasulullaah ﷺ ne farmaaya: Aese shakhs ki bad du'aa se bacho, jis par zulm kiya gaya hai, is liye ke us ki bad du'aa aur Allah ke darmiyaan koi aad (pardah) nahin hoti hai. (Tirmizi: 2014)
No.6
Rasoolullah ﷺ ne farmaaya: Mashgool hone se pehle nek aamaal mein jaldi kiya karo. (Ibne Maaja: 1081)
No.7
Hazrat Abdullah Bin Umar Raziyallahu Anhuma se riwaayat hai ke Nabi Kareem ﷺ ne irshaad farmaaya: Jo shakhs ham par hathiyaar uthaaye wo ham mein se nahi. (Muslim: 280)
No.8
Hazrat Abdullah Raziyallahu Anhu riwaayat karte hain ke Rasulullah ﷺ ne irshaad farmaaya: Musalmaan ko gaali dena bedeeni hai aur qatl karna kufr hai. (Bukhari: 6044) Faida: Jo Musalmaan kisi Musalmaan ko qatl karta hai wo apne Islam ke kaamil hone ki nafi karta hai aur Mumkin hai ke qatl karna kufr par marne ka sabab bhi banjaye. (Mazaahire Haq)
No.9
Hazrat Usman Raziyallahu 'anhu ke Aazaad karda ghulam Hazrat Haani Rahimahullahu farmate hain ke Hazrat Usman (Raziyallahu 'anhu) jab kisi qabr ke paas khadhe hote to bahut rote yahan tak ke aansuon se apni dadhi ko tar kar dete. Unse arz kiya gaya (ye kya baat hai) ke aap Jannat wa Dozakh ke tazkire par nahi rote aur qabr ko dekhkar is qadr rote hain? Aap ne farmaaya ke Rasullulah ﷺ ne irshaad farmaaya: Qabr aakhirat ki manzilon mein se pehli manzil hai agar banda is se najaat pa gaya to aage ki manzilein isse zyaada aasaan hain, aur agar is manzil se najaat na pa saka to baad ki manzilein usse zyaada sakht hain (neez) Rasullulah ﷺ ne ye irshaad farmaaya maine koi manzar qabr ke manzar se zyaada khaufnaak nahi dekha. (Tirmizi: 2308)
No.10
Hazrat Abu Umama (Raziyallahu Anhu) se riwaayat hai ke Rasulullah ﷺ ne irshaad farmaaya: Jis shakhs ne Allah Ta'ala hi keliye kisi se Muhabbat ki aur usi keliye dushmani ki aur (jis ko diya) Allah Ta'ala hi keliye diya aur (jis ko nahi diya) Allah Ta'ala hi keliye nahi diya to us ne Imaan ki takmeel karli. (Abu Dawud: 4681)
For more click here
Aaj ki 10 short part1 Hadeese padne ke liye link per click kare