Aaj Ki 10 Hadeese part5
No.1
Hazrat Jabir Bin Abdullah Raziyallahu Anhuma riwaayat karte hain ke Rasullullah ﷺ ne irshaad farmaaya: Ulama par badaai jatane, bewaqufon se jhagadne yani naasamajh awaam se ulajhne aur majlisein jamane ke liye ilm hasil na karo. Jo shakhs aisa kare uske liye aag hai aag. (Ibn Majah: 254)
Faida: "Ilm ko majlisein jamane ke liye hasil na karo" is jumle ka matlab ye hai ke ilm ke zariye se logon ko apni zaat ki taraf mutawajjeh na karo.
No.2
Hazrat Salman Farsi Raziyallahu Anhu riwaayat karte hain ke Nabi Kareem ﷺ ne irshaad farmaaya: Bilashuba Allah Ta'ala ki zaat mein bahut zyaada haya ki sifat hai woh baghair maange bahut zyaada dene waale hain. Jab aadmi Allah Ta'ala ke saamne maangne ke liye haat uthata hai to unhe in haaton ko khali aur nakaam wapas karne se haya aati hai (isliye zaroor ataa farmane ka faisa farmaate hain). (Tirmizi: 3556)
No.3
Hazrat Abu Hurairah Raziyallahu Anhu se riwaayat hai ke Rasulullah ﷺ ne irshaad farmaaya: Meri saari ummat jannat mein jaayegi siwaaye unlogon ke jo inkaar kadein. Sahaba Raziyallahu Anhum ne daryaaft kiya: Ya Rasulullah! (Jannat mein jaane se) kaun inkaar kar sakta hai? Aapﷺ ne jawaab mein irshaad farmaaya: Jis ne meri ita'at ki woh jannat mein daakhil hua aur jis ne meri nafarmani ki yaqeenan usne jannat mein jaane se inkar kar diya. (Bukhari: 7280)
No.4
Hazrat Abu Musa Raziyallahu Anhu riwaayat farmaate hain ke Rasulullah ﷺ ne irshaad farmaaya: Jo do thandi Namaazein padhta hai wo jannat mein daakhil hoga. (Bukhari: 574)
Faida: Do thandi Namazon se muraad fajr aur asar ki Namaz hai. Fajr thande waqt ke ikhtetaam per aur asar thandak ki ibteda per ada ki jaati hai. In dono Namazon ka khaas taur par isliye zikr farmaaya ke fajr ki Namaz neend ke ghalba ki wajah se aur asar ki Namaz karobaar ki mashghuliyat ki wajah se padhna mushkil hota hai lehaza in do Namazon ka ehtemaam karne waala yaqeenan baaqi teen Namazon ka bhi ehtemaam karega. (Mirqat)
No.5
Hazrat Abu Hurairah Raziyallahu Anhu farmaate hain ke maine Rasulullah ﷺ ko ye irshaad farmaate hue suna: Ghaur se suno! Duniya aur Duniya mein jo kuch hai wo Allah Ta'ala ki rehmat se door hai, albatta Allah Ta'ala ka zikr aur woh cheezein jo Allah Ta'ala se qareeb karein (yani nek amal) aur Aalim aur Talib-e-Ilm ke ye sab cheezein Allah Ta'ala ki rehmat se door nahi hain. (Tirmizi: 2322)
No.6
Huzoor ﷺ ne farmaaya: Imaan ka maza us shakhs ne chakh liya, jis ne Allah ko apna Rab, Islam ko apna Deen aur Muhammad ﷺ ko apna Rasool maan kar khush ho gaya. (Muslim: 151)
No.7
Hadees: Allah ke Nabi ﷺ ka irshaad hai: Woh shakhs Jannat mein nahi jaayega, jis ke dil mein zarrah baraabar bhi takabbur (ghamand) hoga. (Muslim: 267)
No.8
Hadees: Huzoor ﷺ ne farmaaya: Aadmi ke jhoota hone ke liye yahi kaafi hai ke woh har suni sunaai baat ko bayaan karta phire. (Muslim: 8)
No.9
Hazrat Abu Hurairah Raziyallahu Anhu riwaayat karte hain ke Rasulullah ﷺ ne irshaad farmaaya: Munafiqeen par sabse zyaada bhaari isha aur fajr ki Namaaz hai. (Muslim: 1482)
No.10
Huzoor ﷺ ne farmaaya: Jo shakhs mujh par ek dafa Durood padhega, Allah Ta'ala us par 10 rehmatein naazil farmaayeinge aur us ke 10 gunaah maaf kareinge aur us ke 10 darje buland kareinge. (Nasai: 1297)